Pantun Manyerak Bareh Kunik #2

Bagian kedua Pantun Manyerak Bareh Kunik

..
Janjirak buah janjuri
Tiradah daun jilatang
Tumbuah di batang baringin sonsang
Siriah galak pinang manari
Mananti alek nan lah datang
Duduak basimpuah di rumah gadang

Kayu talatak daam rimbo
Bari baaukie batarawang
Lapiak takambang alek tibo
Cabiak siriah gatoklah pinang

Lah masak rambai nan manih
Sataun tupai mamanjeknyo
Anak daro rancak marapulai manih
Anak mandeh kaduonyo

Lah buliah suto pitalah
Diambiak pangarang bungo
Kito basyurkur kapado Allah
Anak surang lah jadi baduo

Balayia kapa ka taluak cino
Balabuah tantang limau manih
Juduan subang ka talingo
Jalinan cincin ka jari manih

Kaluak paku kacang balimbiang
Tampuruang lenggang lenggangkan
DIbaok urang ka saruaso
Anak dipangku kamanakan dibimbiang
Urang kampuang dipatenggangkan
Tenggang nagari jan binaso

Camaik padang siamuah
Ka baruah ka padang sarai
Lah tamaik kain bakabuang
Lah lusuah bacarai

Abang daulu mako ka kamaik
Takabia daulu mako sumbayang
Bacarai Allah jo Muhammad
Mako bacarai kasiah jo sayang

Laguah lagah bunyi padati
Padati urang dari padang
Ganto kabau tadanga juo
Walau sapiriang dapek pagi
Sapiriang dapek patang
Rumah tangga dibina juo

Anak niniak mandi ka sungai
Tabang malayok ka subarang
Usah diniaik nak bacarai
Antah kok mati salah surang

Rumah gadang ba atok ijuak
Baukia bamego-mego
Di suduik talatak takaik
Kok lai elok iduik isuak
Urang tuo jan sampai lupo
Bautang dunia akhirat

Buruang gareja tabang ka halaman
Hinggok mancotok-cotok rimah
Bantuaklah keluarga jo tuntunan iman
Nak manjadi keluarga nan sakinah

(.......) namo anak daro
(.......) namo marapulai
Coiko carito ka dimulo
Usah diniaik ka maungkai

Kalau ado jarum nan patah
Usah disimpan di dalam peti
Dibuang sajo ka pamatang
Kok ado kato nan salah
Usah disimpan di dalam hati
Dibuang sajo kabalakang

Kacimpuang pamenan mandi
Rasian pamenan lalok
Kok indak tajajak lalok
Sambah jo maaf kami arok

Cubadak di tangah halaman
Diambiak jo ampu kaki
Digulai jo lado kutu
Usah lamo tagak di laman
Elok ka rumah kito sakali
Duduak di tampek nan lah tatantu

|| Padang Panjang, Juni 2017 |||

Comments

Popular posts from this blog

Prosesi Pelaksanaan Akad Nikah (versi sederhana Adat Minangkabau)

Contoh Teks MC Akad Nikah (Nasional) -dua-